«Archivu de la memoria oral de la conserva en Candás» básase na recopilación de testimonios de persones venceyaes a la industria conservera y pesquera candasina pente medies d’entrevistes de videu recoyíes en códigos QR.
Trátase de la primer fase d’un proyectu que favorez la recuperación, la conocencia, la tresmisión y la puesta en valor d’histories de muncho interés pal públicu en xeneral y pa les xeneraciones nueves en particular. Ye una manera de reconocer l’esfuerzu, de munches persones, sobremanera muyeres, que tuvieron trabayando na industria la conserva como mediu de sobrevivencia, representando una forma de tar nel mundiu y vivir nél.
El papel de la muyer foi fundamental a lo llargo la historia de la industria la conservera candasina. Miles de muyeres convirtiéronse en fuercia de trabayu y tresmisores de conocimientu y de técniques valioses d’ellaboración tradicional que se caltienen anguañu. Esti proyectu reconoz la so figura y contribúi al so emponderamientu.
«Archivu de la memoria oral de la conserva en Candás» entámase dende l’Asociación del Horru Asturianu, por Irene Muñiz Rodríguez y Fernando Mora Rodríguez, en collaboración cola Conseyería de Cultura, Política Llingüística y Deporte del Principáu d’Asturies, l’Ayuntamientu Carreño, l’Asociación Candás Marinero, l’historiador Manuel Ramón Rodríguez Rodríguez, Goyo Rodríguez Creativo y Menganos Producciones.
El proyectu apaez recoyíu na web municipal, na web de l’Asociación del Horru Asturianu y pente medies de plaques con códigos QR asitiaes peles cais de Candás.
