L’Asociación del Hórreo Asturiano ñaz l’añu 2016 en Candás (Carreño) p’axuntar a toles persones que comparten l’interés pol estudiu de los horros, paneres y cabazos asturianos, bienes d’induldable valor patrimonial y etnográficu. Almiradores d’esta silueta única del nuestru paraísu natural, toos y toes la reconocemos como signu de la nuestra identidá asturiana.
L’Horru: patrimoniu cultural
Anguañu nadie niega que los nuestros horros, paneres y cabazos constitúin una manifestación xenuina del nuestru patrimoniu cultural:
- Son protagonistes vivos de la nuestra arquitectura popular, almirables pola so estructura y técnica de construcción en madera. Tesoros que sorprienden pol inxeniosu equilibriu y solidez qu’algamen gracies a toles pieces desmontables que constitúin un bien mueble pensáu y creáu pa poder tresportalos.
- Son testigos del inxeniu técnicu d’aquellos maestros y talleres artesanos de sieglos pasaos, teniendo tamién un valor artísticu que puede observase reflexáu nos distintos estilos decorativos.
- Trátase d’un patrimonio vivu que simboliza una forma de vivir y tar nel mundu, y que supo adaptase a la vida nel mediu rural asturianu a lo llargo los sieglos.
Asociación del Horru Asturianu
Historiadores, arqueólogos, xuristes, urbanites, profesores, artesanos, espertos o aficionaos formen parte yá d’esta asociación, Amigos del Hórreo Asturiano, abierta a tolos interesaos na conservación del horru asturianu que quieran sofitala.
Persones dispuestes a facer un viaxe nel tiempu, al rescate d’una ayalga, que resistente al escaecimientu, malvive nel presente naguando que la conozan y valoren, p’abrise pasu hacia un futuru, n’actualidá, inciertu.
L’Horru: xoya etnográfica
L’horru asturianu ye un patrimoniu de valor incalculable al amosar, con claridá esceicional, cómo l’inxeniu humanu enfrentó un problema esencial que plantegaba la vida real, y que resolvió de forma tan almirable qu’entá anguañu nos sorpriende. Sostenibilidá, eficacia, eficiencia, diversidá, conocimientu del mediu natural y aplicación de técniques tradicionales, son namás les xoyes más clares d’esti cofre de madera que trai hasta nosotros, dende va más de 500 años, la sabiduría ancestral del nuestru pueblu.
Anque perdiera utilidá y recibiera la estremaunción de los sabios, n’actualidá esisten más de 20.000 exemplares distribuyíos per tol territoriu del Principáu. Nun ye una casualidá. Trátase d’un fenómenu estraordinariu que da fe de la unión d’esti cachu viesca con esta tierra. Por embargu, añu ente añu destrúyense horros centenarios, verdaderes xoyes etnográfiques; si la situación d’agora se prollonga, nun mediu-curtiu plazu, el patrimoniu rural d’Asturies col horru ensin dulda como referente, va mallograse ensin igua.
L’horru ye un exemplu d’incalculable valor patrimonial (material y inmaterial) y xeográficu, con gran potencialidá como factor de desarrollu y movilización social, que sintetiza icónicamente la esperiencia emocional que la nuestra comunidá desarrolla na realidá espacial cola que se rellaciona de continuo. Llograr qu’esti fechu se perciba claramente dientro y fuera d’Asturies, ye l’elementu central, qu’al nuestru xuiciu, tien que se perseguir. A esa percepción va contribuyir, y non poco, valorar l’horru como elementu dinamizador de les zones rurales.
Nun ye la etnografía histórico lo que mos interesa, sinon los problemes de los asturianos d’anguañu: al conectar colos nuestros antepasaos, les nuestres almes sanen, y creamos histories nueves, una cultura nueva con niciu en tolo que sabíen los que mos precedieron y que paecía escaecío.
Asociación del Horru Asturianu
